ouveios e outras vozes

Botou a andar em Cuatro um novo programa. O formato é similar ao doutros emitidos com anterioridade por esta canle, mas desta vez o assessoramento tem a ver coa sustentabilidade. A primeira das quatro entregas ―com seica bons resultados de audiência― tivo, ao meu ver, os seus acertos e erros.

Apoiado no trabalho dum técnico ambiental de Ecodes, ¡Qué desperdicio! centra a sua mensage nos benefícios económicos da adopçom de hábitos sustentáveis. Eficaz, quiçá, mas demasiado limitado e simplista, ao meu ver.

Nom é a minha intençom realizar umha crítica exaustiva desta primeira entrega, só comentar alguns aspectos que acho errados:

• Separaçom de resíduos para a sua reciclage, ou de como enlear à gente.

  Para além de confundir separaçom e reciclage, o discurso foi próprio dum sistema orientado à incineraçom combinada coa reciclage dalguns plásticos, papel/cartom e vidro. Só assi se pode entender a insistência numha esquisita selecçom dos resíduos a depositar no “contentor amarelo” e a inexistência dumha separaçom de restos orgánicos.

• Lava-pratos.

  Umha cousa é que se já tés um lava-pratos será melhor que lhe deas uso, e outra bem diferente promover a compra destes electrodomésticos. No programa defendeu-se o seu uso pola suposta maior eficiência em comparaçom co lavado à mao, tanto no consumo de água como de energia. Isto só é possível ignorando o impacto ambiental de todo o ciclo de vida do electrodoméstico, dando por feito que todo o mundo, sempre, lava a louça com água quente e obviando, ademais, que no lava-pratos se utilizam produtos de limpeza agressivos que no lavado a mao podemos evitar.

À marge de aspectos pontuais coma estes ―ou como que se lhe atribua o consumo de cozinha e forno à cozinheira em exclussiva, no lugar de a todas aquelas pessoas para as que se preparam os alimentos―, o mais grave/criticável é o que já era de esperar: ao final, a mensage que transmite ¡Qué desperdicio! fica de mais na superfície, é pouco ambiciosa, conta cumha escasa capacidade de transformaçom. Quem olha o programa e quem participa nel pode tirar umha conclusom nada positiva, a de que para fazer sustentável o nosso modo de vida nom o temos que mudar, senom só matizar… a de que podemos viver na opulência sempre e quando utilizemos lámpadas de baixo consumo.

Contodo, bem-vido seja o programa. O simples feito de que exista, para além de reflectir a crescente preocupaçom social polos problemas ambientais, é positivo, e nom só porque qualquer avanço cara a sustentabilidade é melhor do que nada, senom tamém, e especialmente, porque apostou por contribuír a popularizar umha ferramenta como a pegada ecológica.

À marge disto, ou nom tanto, começa hoje o I Congresso de Educaçom Ambiental dos Países Lusófonos e Galiza.