Seguirám a chegar
O governo espanhol vem de apresentar, junto coa OIM, umha dura campanha publicitária coa que disque pretende combater a imigraçom irregular de orige subsaariana. Desenvolverá-se em Senegal ―actual ponto de partida do grosso dessa migraçom―, custará perto de 1 milhom de euros e os anúncios serám reproduzidos na imprensa, rádio e tv, os mesmos meios que difundem a todo o planeta a opulenta vida nos centros globais, no “Primeiro Mundo”. De verdade pensam que assi parará o éxodo?
Hai mais dum ano que o governo espanhol apresentou o “Plan África”. Pese ao que o seu nome poda sugerir, parecia estar longe de resultar ser umha boa ferramenta para melhorar a vida naquela regiom. A avaliaçom do Plano por parte de Intermón-Oxfam foi contundente: por umha banda, semelha surgido da necesidade de “fazer algo” perante as vagas de imigraçom subsaariana; pola outra, recolhe umha série de medidas que fam del um plano de defesa dos intereses de Espanha em África. Por riba, as políticas com respeito a África, como tantas outras, som contraditórias.
É sabido que hai imigrantes que sobrevivem à longa e dura viage cara Europa e, trás a sua deportaçom, tentam mais umha vez à sorte. Se a experiência nom fai dessistir, menos o fará umha pinga de propaganda num oceano de mensages de ostentaçom dum luxo “ocidental” (o verdadeiro “efeito chamada”) que contrasta fortemente coa grave situaçom na que se atopa umha África Subsaariana que ocupa os últimos postos no IDH: saqueada; devastada económica, social e ambientalmente; inçada de conflitos armados… (Deveriamos falar mais do “efeito expulsom”).
Todo semelha indicar que esse milhom de euros nom vai ser um bom investimento, e nom me surprenderia que vaia ser contabilizado como AOD. Mas, para além disto, tenho umha dúvida com respeito à dureza da campanha: seria aceitável publicidade nesse tom dirigida à cidadania do Estado espanhol para, por exemplo, denunciar os efeitos que as nossas políticas e hábitos tenhem na África subsaariana? Respeitaria o Código de Conduta sobre Images e Mensages?